山峰與旅途的故事 Between Peaks and Roads

人到中年才學車考車牌，由準備筆試開始起計，經過了三年十個月才考完路線。考車牌的過程拖了好長，我想分享一下之前失敗的原因：

拖了又拖 — 筆試合格之後，因為種種原因，我等了一年才去學車。到了學車時，其實不少理論已經忘了，所以未能做到實踐與理想並重。到我肥了路線之後，筆試又過期要重新再考，結果猶如開機又熄機又再開機，機器（個腦）都要 warm up 好耐先可以再嚟過。

冇認真準備考試 — 考筆試，我會識操 paper；但考路線，我以為識揸車去考就得。其實路試都係一個考試，有試題（路線），有 marking scheme（考官睇你做唔做到指定動作）。就算成條街都冇人冇車，但揸到去 roundabout，考官都會睇你識唔識得入 roundabout 前檢查死角有冇cyclist 嚟緊。我冇練習路線，又冇了解考官睇乜，零準備當然好難合格。

心態 — 我最初考車覺得自己都冇出意外，應該都考到合格。但揸車冇出意外只係基本，考車牌的要求係預防意外、指示清楚、執生夠快。僥倖心態係唔可以考到車牌。

懶 — 我成日好多藉口懶練車，天氣差少少又唔想揸，放工累了又唔想揸，放假去旅行又冇乜時間揸，最後斷斷續續揸下又唔揸，一放低就容易忘記。

拖了又拖又考不到車牌後，我曾經也想過不如放棄：我反應又慢；我冇天份揸車；我又唔係好鍾意揸車… 超多負面說話都出現過游說自己放棄，連教車師傅喺最後一堂補鐘都話我揸得差，如果補鐘係模擬考試，我已經肥左超過三次。

但擁有車牌可以令我的 mobility 大增，我可以去更遠的地方，我以此是目標，游說自己點都要完成。

經歷多次失敗之後，我超級冇信心，男朋友鼓勵我： “confidence comes from practice”。我好好檢視自己的學習模式，在臨考試前一個星期狂操練車，最後我考車牌成功路試了。

我想總結以下我自己人到中年，在沒有天資下學習新技能的三個反思，提醒自己日後也要好好記住。

一，掌握新技能其實是肌肉操練。揸車要練習睇得夠遠夠闊（睇路牌、睇人、睇車），手又要控制呔盤到剛剛好的位置，適當時間擰轉頭睇死角、睇隔離線，成件事是一組肌肉的操練。明白了這是不同身體部分一齊合作的事情後，我就用做運動的心態來揸車：在適當的時候，做某個動作。而且肌肉操練需要成日做，不能夠成日唔做，這就沒有藉口唔去做。而經過多次肌肉的重複操練，腦袋都會自動記住這些動作，揸車也會流暢多了。

二，角色扮演來調整心態。經過多次失敗後，我揸車都沒有信心。我臨考試前看了《100 yen love》這日本電影，看到女主角練打拳日練夜練，我在想一個演員要扮演某種角色時，除了靠操練，也要心態上入戲成為一個準備比賽的拳手。我一直開車都沒有信心，自操練揸車肌肉後，我的技術都漸有進步，我也開始心理入戲：我是一個安全駕駛、還可以避免意外出現的司機。

三，讓新技能成為刷牙一樣的習慣。我喜歡的一本書《Atomic habits》提到建立習慣的重要，那不只是習慣，也是朝向自己想成為的一個身分。我檢討自己以前時常有藉口懶開車，現在只要有機會揸車，我都提醒自己要練習。建立習慣，才可以鞏固技能。考到車牌只是得到一個資格用車，我也要持續揸車，我才可以有信心日常使用。

狠狠失敗也有其意義，就是讓我深切體會到「必須要很努力練習，才能看起來不費氣力」。