山峰與旅途的故事 Between Peaks and Roads

早前為準備學揸車，我去咗玩 karting，快到癲但我都冇炒車，簡直係壯晒膽。

後來睇車想買架二手車學車練車，竟然超 surprise 遇上一架自動波，車主係個老太太，超少用行咗不足 50,000km，但因為車齡已廿年兼車身花晒，因此平價出售。我本來猶豫買唔買自動波，因為那我就變成學/練自動波而唔係棍波 (manual)。到試車時，架老爺車真係超順，車主孫女話「揸自動波好方便架，好似 Mario Kart 咁」，一句 Mario Kart 簡直吸引死我，好似真係好易揸！而且那是我一直想買的車款，所以好快就決定買車，兼且改變主意學揸自動波就算。

學車第一步，要學識控制架車，揸自動波的確方便好多，唔使太花時間就學到點控制架車。我唔使諗點轉波，專心睇住路面。我學咗三四日就掌握到，可以正式駛出路面練習。

但我的距離感好弱，我初時轉彎時轉得太勁剷上行人路。
“Will I fail the exam because of this?”
“Yes, definitely!”

由開始學到而家，其實只學咗10日，日日學，日日練，而家轉彎已經順咗好多，入 roundabout 都唔怕。

不過，Brussels 啲人揸車堅亂黎，成日整路，啲路牌又唔清晰，路面其實好危險。有次我右邊架車冇打燈，超快咁轉左喺我前面 cut 線轉去左邊，向前駛的我差少少撞咗埋去，好彩停得切，而呢架冇打燈的車竟然係警車，嚇死我！

到揸 city 已經幾有信心，呢兩日開始揸上 highway。一上 highway，真係個個司機都以為自己揸 Mario Kart 咁，左穿右插，好趕時間返屋企咁，我揸得快又驚青，揸得慢又危險(被撞)；如果條路太直揸得耐又開始眼瞓，highway 唔係我杯茶，但總要學。

今日，我揸車去另一個城市 Namur，諗住練下 highway 兼好奇睇下嗰度的 rock climbing 係點，無啦啦發現咗條超好玩又爬石又行山的短路線，順道行山爬咗40分鐘。

以前我一直都唔想買車，因為養車又貴又煩，但而家揸車對我黎講，好似 mobility 擴大咗個世界，仲有我可以用最方便的方法去到唔同地方行山。歐洲的山好遠，通常要揸車先去到。只要諗學識揸車後可以方便好多咁去做自己喜歡的事，動力自然來。

圖為某夜我好想去練車，揸咗15km去咗 Brussels 景點 Atomium，再揸 10km 返屋企，開心到不得了。